Молитва в День рождения
Го́споди, Бо́же, Влады́ка всего́ ми́ра ви́димого и неви́димого.
От Твое́й Свято́й во́ли зави́сят все дни и ле́та мое́й жи́зни.
Благодарю́ Тебя́, премилосе́рдный О́тче, что Ты дозво́лил мне прожи́ть ещё оди́н год; зна́ю, что по греха́м мои́м я недосто́ин э́той ми́лости, но Ты ока́зываешь мне её по неизречённому человеколю́бию Твоему́.
Продли́ и ещё ми́лости Твои́ мне, гре́шному; продо́лжи жи́знь мою́ в доброде́тели, споко́йствии, в здра́вии, в ми́ре со все́ми сро́дниками и согла́сии со все́ми бли́жними.
Пода́й мне изоби́лие плодо́в земны́х и всё, что к удовлетворе́нию ну́ждам мои́м потре́бно.
Наипа́че* же очи́сти со́весть мою́, укрепи́ меня́ на пути́ спасе́ния, что́бы я, сле́дуя по нему́, по́сле многоле́тней в ми́ре сем жи́зни, прейдя́ в жи́знь ве́чную, удосто́ился быть насле́дником Ца́рства Твоего́ небе́сного.
Сам, Го́споди, благослови́ начина́емый мно́ю год и все́ дни жи́зни мое́й.
Ами́нь.
Молитва в день Нового года
Го́споди Бо́же, все́х ви́димых и неви́димых тва́рей, Творе́ц и Зижди́тель, сотвори́вший времена́ и ле́та, Са́м благослови́ начина́ющийся сего́ дня́ но́вый го́д, кото́рый мы́ считаем от воплоще́ния Твоего́ для на́шего спасе́ния.
Дозволь на́м провести́ се́й го́д и мно́гие по не́м в ми́ре и согла́сии с бли́жними на́шими; укрепи́ и распространи́ Святу́ю Вселенскую Це́рковь, кото́рую Ты́ Са́м основа́л, и спаси́тельной же́ртвой Святого Те́ла и Пречи́стой Кро́ви освяти́л.
Оте́чество на́ше возвы́си, сохрани́ и просла́вь; долгоде́нствие, здра́вие, изоби́лие плодо́в земны́х и благорастворе́ние возду́хов да́й на́м.
Меня́, гре́шнаго раба́ Твоего́, все́х ро́дственников и бли́жних мои́х и все́х благове́рных христиа́н, ка́к и́стинный на́ш верхо́вный Па́стырь, упаси́, огради́ и на пути́ спасе́ния утверди́, что́бы мы́, сле́дуя по нему́ по́сле долговременной и благополучной жи́зни в ми́ре се́м, достигли Ца́рства Твоего́ Небе́снаго и удостоились ве́чного блаже́нства со святы́ми Твои́ми. Ами́нь.
В годовщину крещения
Избавле́ние грехо́в святы́м креще́нием рабу́ Твоему́ (рабе́ Твое́й) дарова́вый, и жи́знь па́ки рожде́ния ему́ (ей) пода́вый, Сам, Влады́ко Го́споди, просвеще́нием лица́ Твоего́ се́рдце его́ (ея́) озаря́ти вы́ну благоволи́; щит ве́ры его́ (ея́) ненаве́тен соблюди́; нетле́ния оде́жду, е́юже оде́яся, нескве́рну в нем (ней) и небла́знену сохрани́, неруши́му в нем (ней) духо́вную печа́ть благода́ти Твоея́ соблюда́я, ми́лостив ему́же (ейже) и нам быва́я, по мно́жеству щедро́т Твои́х.
Я́ко благослови́ся и просла́вися пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Последование молебного пения в праздник св. равноапостольного князя Владимира и в память Крещения Руси
Протодиа́кон: Благослови́, Влады́ко.
Предстоя́тель: Благослове́н Бог наш всегда́, ны́не и при́сно, и во ве́ки веко́в.
Лик: Ами́нь.
Протодиа́кон: Сла́ва Тебе́, Бо́же наш, сла́ва Тебе́.
Лик: Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
И возглаша́ет протодиа́кон:
Бог Госпо́дь и яви́ся нам, благослове́н Гряды́й во И́мя Госпо́дне.
Стих: Испове́дайтеся Го́сподеви, я́ко Благ, я́ко в век ми́лость Его́.
Стих: Обыше́дше, обыдо́ша мя, и И́менем Госпо́дним противля́хся им.
Стих: Не умру́, но жив бу́ду и пове́м дела́ Госпо́дня.
Стих: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей и есть ди́вен во очесе́х на́ших.
Лик: Бог Госпо́дь… во глас 8, к коему́ждо стиху́.
Та́же тропа́рь Живонача́льней Тро́ице, глас 8:
Благослове́н еси́, Христе́ Боже наш,/ И́же прему́дры ловцы́ явле́й,/ ниспосла́в им Ду́ха Свята́го,/ и те́ми уловле́й вселе́нную,/ Человеколю́бче сла́ва Тебе́.
Тропа́рь Всем святы́м,
в Земли́ Ру́сстей просия́вшим, глас то́йже:
Я́коже плод кра́сный Твоего́ спаси́тельного се́яния,/ Земля́ Ру́сская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це/ Це́рковь и страну́ на́шу Богоро́дицею соблюди́, Многоми́лостиве.
Тропа́рь Креще́ния Руси́, глас то́йже:
Благослове́н еси́, Христе́ Бо́же наш,/ Зе́млю Ру́сскую Креще́нием просвети́вый,/ лю́дем ея́ низпосла́в Ду́ха Свята́го,/ и́хже и ко спасе́нию приведы́й,/ Человеколю́бче, сла́ва Тебе́.
Тропа́рь равноапо́стольному кня́зю Влади́миру, глас 4:
Уподо́бился еси́ купцу́ и́щущему до́браго би́сера,/ славнодержа́вный Влади́мире,/ на высоте́ стола́ седя́ ма́тере градо́в,/ Богоспаса́емаго Ки́ева,/ испыту́я же и посыла́я к Ца́рскому гра́ду/ уве́дети правосла́вную ве́ру,/ обре́л еси́ безце́нный би́сер, Христа́,/ избра́вшаго тя, я́ко втора́го Па́вла,/ и оттря́сшаго слепоту́ во святе́й купе́ли, душе́вную вку́пе и теле́сную./ Те́мже пра́зднуем твое́ успе́ние, лю́дие твои́ су́ще:/ моли́ спасти́ся душа́м на́шим.
Запе́вы:
Пресвята́я Тро́ице, Бо́же наш, сла́ва Тебе́.
Вси святи́и земли́ на́шея, моли́те Бо́га о нас.
Святы́й равноапо́стольный вели́кий кня́же Влади́мире, моли́ Бо́га о нас.
Сла́ва Отцу́ и Сы́ну и Свято́му Ду́ху.
И ны́не и при́сно, и во ве́ки веко́в. Ами́нь.
Та́же:
Проки́мен, глас 4: Вознесо́х избра́ннаго от люде́й Мои́х.
Стих: И́бо рука́ Моя́ засту́пит его́, и мы́шца моя́ укрепи́т его́.
Протодиа́кон: И о сподо́битися нам слы́шанию свята́го Ева́нгелия, Го́спода Бо́га мо́лим.
Лик: Го́споди, поми́луй (три́жды).
Протодиа́кон: Прему́дрость, про́сти, услы́шим свята́го Ева́нгелия.
Предстоя́тель: Мир всем.
Лик: И ду́хови твоему́.
Предстоя́тель: От Матфе́а свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Протодиа́кон: Во́нмем.
Предстоя́тель чтет Ева́нгелие от Матфе́я, зача́ло 55.
Лик: Сла́ва Тебе́ Го́споди, сла́ва Тебе́.
Запе́вы:
Пресвята́я Тро́ице, Бо́же наш, сла́ва Тебе́.
Вси святи́и земли́ на́шея, моли́те Бо́га о нас.
Святы́й равноапо́стольный вели́кий кня́же Влади́мире, моли́ Бо́га о нас.
Сла́ва Отцу́ и Сы́ну и Свято́му Ду́ху.
И ны́не и при́сно, и во ве́ки веко́в. Ами́нь.
Посе́м:
Досто́йно есть, я́ко вои́стину, блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего, Честне́йшую херуви́м и Сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
И глаго́лет протодиа́кон ектению́:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй (три́жды).
Еще́ мо́лимся о вели́ком господи́не и отце́ на́шем Святе́йшем Патриа́рхе Кири́лле и о всей во Христе́ бра́тии на́шей.
Лик: Го́споди, поми́луй (три́жды).
Благодаря́ще со стра́хом и тре́петом, я́ко раби́ непотре́бнии, Твоему́ благоутро́бию, Спа́се и Влады́ко наш, Го́споди, о Твои́х благодея́ниих, я́же излия́л еси́ на Зе́млю на́шу от Креще́ния ея́ и до ны́не, и припа́даем, и славосло́вие Тебе́, я́ко Бо́гу, прино́сим, и умиле́нно вопие́м: изба́ви от всех бед лю́ди Твоя́ и всегда́, я́ко Ми́лостив, испо́лни во благи́х проше́ния на́ша, приле́жно мо́лимся Тебе́, услы́ши и поми́луй.
Лик: Го́споди, поми́луй (три́жды).
Еще́ мо́лимся Тебе́, Спаси́телю на́шему, чрез благове́рнаго кня́зя Влади́мира благоволи́вшему избра́ти род наш в насле́дие Свое́ и в купе́ли Креще́ния дарова́ти Ду́ха Свята́го, о е́же Це́рковь на́шу Святу́ю от раско́лов и нестрое́ний соблюсти́, и в единомы́слии ве́ры ея́ утверди́ти, и ми́ром огради́ти, услы́ши и поми́луй.
Лик: Го́споди, поми́луй (три́жды).
Еще́ мо́лимся Тебе́, Го́споди Вседержи́телю, о е́же призре́ти и утверди́ти виногра́д сей, его́же насади́ и сохрани́ от всех наве́тов вра́жиих десни́ца Твоя́; и в пре́дняя ле́та да́руй насле́дию Твоему́ мир и безмяте́жие, да не ума́лится и не поколе́блется Русь Свята́я, ю́же избра́л еси́ в жили́ще Себе́, да сла́вится Трисвято́е И́мя Твое́, услы́ши и поми́луй.
Лик: Го́споди, поми́луй (три́жды).
Да́вый за́поведь Твою́ нам, е́же люби́ти Тебе́, Бо́га на́шего, и бли́жняго своего́, сотвори́, да не́нависти, вражды́, оби́ды и про́чая беззако́ния прекратя́тся, и́стинная же любо́вь да ца́рствует в сердца́х на́ших, мо́лим Ти ся, Спаси́телю наш, услы́ши и ми́лостивно поми́луй.
Лик: Го́споди, поми́луй (три́жды).
Предстоя́тель: Услы́ши ны, Бо́же, Спаси́телю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.
Лик: Ами́нь.
Протодиа́кон: Го́споду помо́лимся.
Лик: Го́споди, поми́луй.
Предстоя́тель чтет моли́тву:
Триипоста́сный Бо́же, О́тче Вседержи́телю, Сы́не Единоро́дный, Спаси́телю ми́ра, и Ду́ше Святы́й, просвеща́яй и освяща́яй племена́ и наро́ды! И́же и влады́ку Земли́ Ру́сския, кня́зя Влади́мира, к све́ту и́стинныя ве́ры наста́вивый, и тем всю страну́ на́шу Креще́нием просвети́вый, и со́нмом святы́х, я́ко пресве́тлым звезда́м, не́бо Це́ркве на́шея украси́вшим, возсия́ти дарова́вый! И нам, смире́нным и недосто́йным ча́дом их, ны́не предстоя́щим сла́ве Твое́й и благода́рственное моле́бное пе́ние принося́щим в се́й [тысящеле́тный] день Креще́ния Руси́, вели́кую ми́лость дарова́вый, е́же сла́вити, хвали́ти и благодаре́ние приноси́ти Тебе́ за вся благодея́ния, бы́вшая на Руси́ от лет дре́вних и до ны́не. При́зри на ни́ву Твою́, Це́рковь Святу́ю, на страны́ и наро́ды, прее́мственно восприя́вшия ве́ру правосла́вную из еди́ной купе́ли Креще́ния в вода́х днепро́вских и ны́не принося́щих Тебе́, я́коже прекра́сный плод спаси́тельнаго се́яния Сло́ва Твоего́, ли́ки святы́х. Ти́и бо послужи́ша лю́дем свои́м ве́рою, наде́ждою и любо́вию, о́бразом сло́ва и жития́ указу́юще нам путь к соверше́нству по за́поведи Христо́вой: бу́дите у́бо соверше́ни, я́ко же и Оте́ц ваш Небе́сный соверше́н есть. Сохраня́юще сие́ свято́е насле́дие их, мо́лимся Ти, Жизнода́вче: спаси́ и поми́луй нас, мир ми́ру Твоему́ да́руй и всему́ созда́нию Твоему́, его́же по грехо́м на́шим сыны́ ве́ка сего́ погуби́ти тща́тся. Ве́мы бо, я́ко не хо́щеши сме́рти гре́шников, но е́же обрати́тися и живы́м им бы́ти; при́зри на нас, во гресе́х пребыва́ющих, отврати́ гнев Твой, пра́ведно дви́жимый на ны, да́руй нам покая́ние и Твои́м неизрече́нным милосе́рдием поми́луй нас. Приими́ моли́твы и труды́ на́ша о умноже́нии любве́ среди́ всех люде́й ми́ра сего́. Зе́млю на́шу огради́, вла́сти умудри́, вся уте́ши и умири́, Це́рковь Твою́ возрасти́, достоя́ние Твое́ соблюди́, му́жи и жены́, и младе́нцы благода́тию просвети́, и вся лю́ди Твоя́ в Правосла́вии и благоче́стии утверди́ моли́твами Пречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́ и Всех святы́х, в Земли́ на́шей просия́вших, да в едине́нии ве́ры и любве́ сла́вим Тя, Отца́ и Сы́на и Свята́го Ду́ха, во ве́ки веко́в.
Лик: Ами́нь.
Велича́ние:
Велича́ем тя, святы́й равноапо́стольный вели́кий кня́же Влади́мире, и чтим святу́ю па́мять твою́, и́долы попра́вшаго и всю зе́млю Ру́сскую Святы́м Креще́нием просвети́вшаго.
Протодиа́кон: Прему́дрость.
Свяще́нник: Пресвята́я Богоро́дице, спаси́ нас.
Лик: Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь. Го́споди, поми́луй (три́жды). Благослови́.
Предстоя́тель твори́т отпу́ст.
И по отпу́сте а́бие глаго́лет протодиа́кон многоле́тие:
Вели́кому господи́ну и отцу́ на́шему Кири́ллу, Святе́йшему Патриа́рху Моско́вскому и всея́ Руси́ и Свя́то-Тро́ицкия Се́ргиевы Ла́вры священноархимандри́ту, богохрани́мей стране́ на́шей, власте́м, во́инству и наро́дам ея́, всему́ освяще́нному собо́ру, благоче́стия ревни́телем и учи́телем, и всем во Правосла́вии Земли́ на́шея подвиза́ющимся сло́вом, писа́нием, уче́нием и богоуго́дным житие́м, и всем правосла́вным христиа́ном — мно́гая ле́та.
Лик: Мно́гая ле́та (три́жды).
