Конда́к 1
Избра́нный сосу́де Бо́жия благода́ти, исто́чниче чуде́с благоуха́нный, Иве́рии похвало́, досточу́дне о́тче Гаврии́ле! Прино́сим ти ны́не хвале́бное пе́ние, ты же, име́яй ве́лие дерзнове́ние ко Го́споду, от вся́ких нас бед свободи́, да любо́вию зове́м ти: Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
И́кос 1
А́нгельскому житию́ подража́я, чистото́ю и смире́нием Бо́гу угоди́л еси́, преблаже́нне о́тче Гаврии́ле, и ве́лиих даро́в Свята́го Ду́ха удосто́ился еси́. Вели́чию по́двига твоего́ дивя́щеся, вопие́м ти си́це:
Ра́дуйся, кла́дезю прему́дрости Бо́жией;
ра́дуйся, живы́й исто́чниче ве́ры.
Ра́дуйся, дре́во, плод духо́вный произрасти́вшее;
ра́дуйся, скрижа́ле, зако́н Христо́в прия́вшая.
Ра́дуйся, от рожде́ния Бо́гом избра́нный;
ра́дуйся, на служе́ние Ему́ призва́нный.
Ра́дуйся, чудесы́ зе́млю И́верскую облиста́вый;
ра́дуйся, житие́м богоуго́дным просия́вый.
Ра́дуйся, Го́сподем на ка́мене ве́ры утвержде́нный;
ра́дуйся, с любо́вию И́мя Христо́во пропове́давый.
Ра́дуйся, мно́гия ско́рби в житии́ претерпе́вый;
ра́дуйся, с ве́лиею ра́достию в Ца́рствие Небе́сное вше́дый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 2
Ви́дяще от ра́ки твоея́ чуде́с преоби́льное излия́ние, преподо́бне о́тче Гаврии́ле, утвержда́емся в ве́ре и благоче́стии. Ди́внаго тя уго́дника Бо́жия почита́юще, благода́рными усты́ взыва́ем ко Го́споду, пода́телю благи́х: Аллилу́иа.
И́кос 2
Ра́зуму на́шему просвеще́ние у Го́спода испроси́, уго́дниче Бо́жий Гаврии́ле, да оттря́сше земно́е пристра́стие и су́етныя попече́ния, вознесе́мся се́рдцем и мы́слию в селе́ния ра́йская, иде́же ты пребыва́еши, и возгласи́м ти си́це:
Ра́дуйся, рая́ Христо́ва благоуха́ние;
ра́дуйся, благода́ти Бо́жия сия́ние.
Ра́дуйся, уде́ла Бо́жия Ма́тере похвало́ и украше́ние;
ра́дуйся, де́рзких святота́тцев устраше́ние.
Ра́дуйся, от ю́ности мона́шескаго уедине́ния иска́вый;
ра́дуйся, Го́спода на по́мощь призыва́вый.
Ра́дуйся, глаго́лу Бо́жию внима́вый;
ра́дуйся, за́поведем Его́ после́довавый.
Ра́дуйся, вери́ги мни́маго безу́мия носи́вый;
ра́дуйся, прельще́ния ми́ра сего́ посрами́вый.
Ра́дуйся, нищету́ и поруга́ние возлюби́вый;
ра́дуйся, И́мя Бо́жие просла́вивый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 3
Си́лою любве́ Христо́вы, дарова́нныя ти свы́ше, укрепля́емый, преподо́бне о́тче Гаврии́ле, поревнова́л еси́ подъя́ти по́двиги по о́бразу отце́в Це́ркве дре́вния. В смире́нии и кро́тости возраста́я, о по́мощи Небе́сней моли́лся еси́, взыва́я ко Го́споду: Аллилу́иа.
И́кос 3
Име́я ве́лию ве́ру и тве́рдое упова́ние на Го́спода, путь юро́дства избра́л еси́, досточу́дне о́тче Гаврии́ле. И мы, с любо́вию воспева́юще и прославля́юще Бога, ди́внаго во святы́х Свои́х, вопие́м ти си́це:
Ра́дуйся, луче́ Со́лнца пра́вды;
ра́дуйся, све́том Христо́вым осия́нный.
Ра́дуйся, адама́нте ве́ры Правосла́вныя;
ра́дуйся, по́стников сла́во и похвало́.
Ра́дуйся, све́том ве́ры сердца́ на́ша озаря́яй;
ра́дуйся, благогове́нию нас науча́яй.
Ра́дуйся, благоче́стия ревни́телю;
ра́дуйся, хра́ма Бо́жия усе́рдный строи́телю.
Ра́дуйся, святы́ни от поруга́ния спаса́вый;
ра́дуйся, преще́ния гони́телей не убоя́выйся.
Ра́дуйся, и́го Христо́во с любо́вию носи́вый;
ра́дуйся, усе́рдно Бо́гу послужи́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 4
Бу́ри жите́йскаго мо́ря избе́гнувый, уедине́ния и моли́твы иска́вый, во оби́тель Бетани́йскую прише́л еси́, преблаже́нне о́тче Гаврии́ле. Духоно́сными отцы́ наставля́емый, прославля́ше Го́спода Вседержи́теля, во умиле́нии се́рдца взыва́я Ему́: Аллилу́иа.
И́кос 4
Слы́шавше жи́тели Иве́рии о дерзнове́нии твое́м среди́ безбо́жных громогла́сно И́мя Христо́во сла́вити, дивля́хуся по́двигу твоему́. Ты же, посрами́в и́дольское поклоне́ние куми́ру, на крест страда́ний возше́л еси́. Прославля́юще по́двиг твой, преподо́бне о́тче Гаврии́ле, возглаша́ем ти си́це:
Ра́дуйся, ча́до духоно́сное отце́в Бетани́йских;
ра́дуйся, ревни́телю подвиго́в и́ноческих.
Ра́дуйся, Це́ркве Христо́вы све́тлое украше́ние;
ра́дуйся, земли́ И́верския озаре́ние.
Ра́дуйся, нището́ю и ра́зумом обогати́выйся;
ра́дуйся, го́рния сла́вы приобщи́выйся.
Ра́дуйся, по́двиги свои́ми диа́вола связа́вый;
ра́дуйся, изображе́ние безбо́жнаго вожда́ огню́ преда́вый.
Ра́дуйся, во у́зах ве́ру Христо́ву пропове́давый;
ра́дуйся, гре́шных к покая́нию подви́гнувый.
Ра́дуйся, с безу́мными в дом ско́рби заточе́нный;
ра́дуйся, чудесы́ Бо́жиими просла́вленный.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 5
Боготе́чная звезда́, возсия́вшая на небоскло́не Иве́рии, был еси́, досточу́дне о́тче Гаврии́ле. Страда́ния и поноше́ния за Христа́ претерпе́вый, к отве́рженным сопричте́нный, ны́не в ли́це святы́х Го́спода сла́виши, воспева́я Ему́: Аллилу́иа.
И́кос 5
Ви́дя враг спасе́ния на́шего ре́вность твою́ о Бо́зе, преподо́бне, я́рость свою́ излия́ на тя чрез вла́сти безбо́жныя. Сего́ ра́ди уде́л твой, о́тче святы́й, бы́ша ско́рби и гоне́ния. Мы же, воспева́юще по́двиги твоя́, А́нгелы удиви́вшия, с любо́вию глаго́лем ти:
Ра́дуйся, исто́чниче чуде́с Боже́ственных;
ра́дуйся, страда́льче, любо́вию испо́лненный.
Ра́дуйся, клевету́ благоду́шно претерпе́вый;
ра́дуйся, любо́вию враго́в победи́вый.
Ра́дуйся, ми́лостыню смире́нно проси́вый;
ра́дуйся, на Небеси́ мзду получи́вый.
Ра́дуйся, житие́м среди́ моги́л страх искорени́вый;
ра́дуйся, еди́наго греха́ отто́ле боя́тися научи́выйся.
Ра́дуйся, глад и мраз нивочто́же вменя́яй любве́ ра́ди Христо́вы;
ра́дуйся, реки́й, я́ко скорбьми́ науча́емся ве́ре и любви́.
Ра́дуйся, во оби́телях Небе́сных возсия́вый;
ра́дуйся, Мате́рию Бо́жиею уте́шенный.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 6
Пропове́дует страна́ И́верская тебе́, досточу́дне о́тче Гаврии́ле, ско́раго в беда́х засту́пника и те́плаго моли́твенника о спасе́нии душ на́ших. Крест юро́дства смире́нно носи́вый, в ско́рбех Го́спода благодари́вый, и ны́не нас учи́ши Христа́ сла́вити и моли́твенно пе́ти Ему́: Аллилу́иа.
И́кос 6
Возсия́л еси́ благода́тию, я́ко свети́льник пресве́тлый и заря́ сия́ющая, преподо́бне о́тче Гаврии́ле. Воспева́юще ве́лии по́двиги и труды́ твоя́, с любо́вию возглаша́ем ти си́це:
Ра́дуйся, Ду́ха Свята́го обита́лище;
ра́дуйся, дарова́ний ве́лиих вмести́лище.
Ра́дуйся, оби́тели Самтаври́йския украше́ние;
ра́дуйся, сла́вы святы́х ди́вное умноже́ние.
Ра́дуйся, плотско́е мудрова́ние ду́ху покори́вый;
ра́дуйся, лука́вство вра́жие посрами́вый.
Ра́дуйся, за мни́мым винопи́тием благода́тные да́ры Бо́жии сокры́вый;
ра́дуйся, стра́ждущих от неду́га пиа́нства исцели́вый.
Ра́дуйся, гре́шным сострада́вый;
ра́дуйся, спасе́ния всем жела́вый.
Ра́дуйся, устраше́ния вра́жия презре́вый;
ра́дуйся, Правосла́вие дерзнове́нно пропове́давый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 7
Хотя́ Го́споду послужи́ти, достохва́льне о́тче Гаврии́ле, отве́ргл еси́ вся скоропреходя́щая и су́етная ми́ра сего́. Путе́м страда́ний за Христо́м сле́дуя, в простоте́ се́рдца с любо́вию взыва́л еси́ Ему́: Аллилу́иа.
И́кос 7
Но́ваго тя преподо́бнаго воздви́же Госпо́дь, прехва́льне о́тче Гаврии́ле, во времена́ тя́жких гоне́ний на Це́рковь Христо́ву. Прославля́юще ве́лий по́двиг твой, досточу́дне, вопие́м ти си́це:
Ра́дуйся, сто́лпе Правосла́вия;
ра́дуйся, и́скренний дру́же Христо́в.
Ра́дуйся, благода́тию Бо́жиею в ско́рби согре́тый;
ра́дуйся, Ца́рствия Небе́снаго насле́дниче святы́й.
Ра́дуйся, испо́лненный любве́ Боже́ственныя;
ра́дуйся, равноа́нгельно пожи́вый.
Ра́дуйся, на земли́ гони́мый;
ра́дуйся, на Небеси́ со святы́ми Христа́ сла́вящий.
Ра́дуйся, милосе́рдие Бо́жие ко гре́шным призыва́яй;
ра́дуйся, заблу́ждших вразумля́яй.
Ра́дуйся, моли́твами твои́ми супру́г от непло́дства исцели́вый;
ра́дуйся, о рожде́нии дще́ри им предвозвести́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 8
Стра́нник и пришле́ц в ми́ре сем был еси́, достохва́льне о́тче Гаврии́ле. Взыску́я Гра́да Небе́снаго, избра́л еси терни́стый спаси́тельный путь, за вся благодаря́ милосе́рдаго Го́спода и поя́ Ему́: Аллилу́иа.
И́кос 8
Весь испо́лнь Боже́ственныя благода́ти, в многотру́днем по́двизе Го́сподем укрепля́емый, взыва́л еси́ Ему́: Засту́пник мой и прибе́жище мое́, Бог мой, и упова́ю на Него́! И всех нас учи́ши со Христо́м пребыва́ти, зову́щих ти:
Ра́дуйся, вождю́ и́щущих спасе́ния;
ра́дуйся, страны́ И́верския спаси́тельное насажде́ние.
Ра́дуйся, Правосла́вныя ве́ры побо́рниче;
ра́дуйся, святы́х ди́вный собесе́дниче.
Ра́дуйся, оби́димых защи́тителю;
ра́дуйся, скорбя́щих уте́шителю.
Ра́дуйся, по́мощь ско́рую нам явля́яй;
ра́дуйся, к покая́нию нас призыва́яй.
Ра́дуйся, мрак отча́яния отгоня́яй;
ра́дуйся, наде́ждею сердца́ на́ша окриля́яй.
Ра́дуйся, моли́твою от внеза́пныя сме́рти исхища́яй;
ра́дуйся, от бед и напа́стей избавля́яй.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 9
Вси святи́и и Си́лы Небе́сныя ра́достно тя прия́ша, достохва́льне о́тче Гаврии́ле, егда́ путь земна́го стра́нствия сконча́в, возне́слся еси́ к Го́рнему Иерусали́му. И мы дивя́щеся, какова́го чудотво́рца и моли́твенника дарова́ нам Госпо́дь, в благодаре́нии се́рдца взыва́ем Ему́: Аллилу́иа.
И́кос 9
Вети́и суему́дреннии не возмо́гут пости́гнути высоту́ по́двига твоего́, преподо́бне. Ве́лия дары́ Ду́ха Свята́го под ри́зою юро́дства скрыва́вый, чистото́ю жития́ просия́вый, к безу́мным причте́нный, му́дрость ми́ра сего́ посрами́л еси́, досточу́дне о́тче Гаврии́ле. Сего́ ра́ди похваля́ем тя си́це:
Ра́дуйся, цве́те рая́ благоуха́нный;
ра́дуйся, пра́вды ра́ди изгна́нный.
Ра́дуйся, житие́м непоро́чным, я́ко фи́никс, процветы́й;
ра́дуйся, уго́дниче Бо́жий преусе́рднейший.
Ра́дуйся, сия́нием свя́тости сердца́ согре́вый;
ра́дуйся, некра́домое бога́тство души́ име́вый.
Pаду́йся, нището́ю духо́вною Ца́рствие Небе́сное стяжа́вый;
ра́дуйся, кро́тости ра́ди зе́млю обетова́ния насле́дивый.
Ра́дуйся, моли́твою к Бо́гу пламене́вый;
ра́дуйся, муче́ния ра́ди Христа́ претерпе́вый.
Ра́дуйся, благода́тию Бо́жией укрепля́емый;
ра́дуйся, Ду́хом Святы́м наставля́емый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 10
Спаси́тельным путе́м ше́ствуя к Небе́сному Иерусали́му, дух ми́рен стяжа́л еси́, преподо́бне о́тче Гаврии́ле. Кре́пкое упова́ние на Го́спода возложи́в, нас ны́не учи́ши стопа́м Христо́вым сле́довати и во́ли Его́ благо́й предава́тися, воспева́юще Ему́ с любо́вию: Аллилу́иа.
И́кос 10
Стена́ необори́мая моли́твы, щи́те, огражда́яй ве́рных, во́ине Христо́в, из про́пасти поги́бели гре́шных исхища́яй, ты еси, достохва́льне! Те́мже мо́лим тя: не оста́ви нас, страстьми́ обурева́емых, по́мощию твое́ю, да зове́м ти си́це:
Ра́дуйся, любве́ Бо́жия зерца́ло;
ра́дуйся, кро́тких похвало́.
Ра́дуйся, немощны́х в ве́ре укрепле́ние;
ра́дуйся, стра́ждущих заступле́ние.
Ра́дуйся, наста́вниче и́щущих спасе́ния;
ра́дуйся, го́рдых вразумле́ние.
Ра́дуйся, исто́чниче Боже́ственных исцеле́ний;
ра́дуйся, насле́дниче ра́йских селе́ний.
Ра́дуйся, свети́льниче, во мра́це безбо́жия просия́вый;
ра́дуйся, пропове́дниче, злове́рие облича́вый.
Ра́дуйся, посто́м и моли́твою си́лу вра́жию низложи́вый;
ра́дуйся, смире́нием ду́хи зло́бы победи́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 11
Пе́ние хвале́бное прино́сим ти, досточу́дне о́тче Гаврии́ле. Весели́тся Иве́рия, лику́ет оби́тель Самтаври́йская, прославля́юще милосе́рднаго Го́спода, дарова́вшаго уго́дника Своего́, с любо́вию возглаша́юще Пода́телю вся́ческих благ: Аллилу́иа.
И́кос 11
Свет пречу́дный, звезда́ путево́дная су́щим во мра́це грехо́внем был еси́, преподо́бне о́тче Гаврии́ле. Гро́знаго явле́ния Цари́цы Небе́сныя удосто́енный, умоля́ше ма́терей во утро́бе ча́да своя́ не губи́ти. Те́мже, я́ко па́стырю усе́рдному, взыва́ем ти си́це:
Ра́дуйся, пресла́вный избра́нниче Бо́жий;
ра́дуйся, от ю́ности Ему́ угоди́вый.
Ра́дуйся, И́менем Иису́совым враги́ побежда́вый;
ра́дуйся, Взбра́нную Воево́ду на по́мощь призыва́вый.
Ра́дуйся, Ца́рствия Небе́снаго иска́вый;
ра́дуйся, сокро́вища Ду́ха Свята́го стяжа́вый.
Ра́дуйся, громогла́сне сло́во Бо́жие возвеща́вый;
ра́дуйся, неве́рие дерзнове́нно посрами́вый.
Ра́дуйся, диади́му му́дрости в юро́дстве носи́вый;
ра́дуйся, вене́ц сла́вы на Небеси́ прия́вый.
Ра́дуйся, жизнь свою́ Бо́гови посвяти́вый;
ра́дуйся, драгоце́нный дар ве́ры от ю́ности сохрани́вый.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 12
Благода́ть Бо́жию стяжа́вый, путе́м за́поведей Христо́вых Гра́да Небе́снаго дости́гнувый, преподо́бне о́тче Гаврии́ле, ны́не в Це́ркви торжеству́ющей с ли́ки святы́х и Небе́сных Сил велегла́сно Царя́ ца́рствующих сла́виши и возно́сиши Ему́ хвале́бную песнь: Аллилу́иа.
И́кос 12
Пою́ще пресла́вныя по́двиги и чудеса́ твоя́, удивля́емся равноа́нгельному житию́ твоему́, достохва́льне о́тче Гаврии́ле, и возно́сим ти хвале́бныя моли́твы на́ша, с любо́вию взыва́юще ти си́це:
Ра́дуйся, в ри́зу смире́ния облече́нный;
ра́дуйся, на высоту́ Небе́сную вознесе́нный.
Ра́дуйся, благода́ти Бо́жия еле́ю благоуха́нный;
ра́дуйся, испове́дниче Христо́в избра́нный.
Ра́дуйся, де́лателю моли́твы Иису́совы;
ра́дуйся, побежда́яй супоста́тов И́менем Христо́вым.
Ра́дуйся, власте́й предержа́щих обличи́телю;
ра́дуйся, мудрова́ния мирска́го посрами́телю.
Ра́дуйся, инове́рца от тя́жкаго неду́га исцели́вый;
ра́дуйся, све́том ве́ры Христо́вы душу его́ просвети́вый.
Ра́дуйся, ра́ковыя я́звы и ины́х боле́зней исцели́телю;
ра́дуйся, бе́сы одержи́мых свободи́телю.
Ра́дуйся, преподобне Гаврии́ле испове́дниче, Христа́ ра́ди юро́диве и чудотво́рче!
Конда́к 13
О прехва́льне и досточу́дне о́тче Гаврии́ле, ско́рый уте́шителю и предста́телю наш! Приими́ от нас сие́ похва́льное пе́ние, умоли́ Влады́ку Вседержи́теля, да изба́вимся ве́чнаго осужде́ния и му́ки и да сподо́бимся с тобо́ю воспева́ти Ему́: Аллилу́иа.
Моли́тва
О блаже́нне Гаврии́ле, дре́вним отце́м подо́бниче и тве́рдый ве́ры испове́дниче, от младе́нства Госпо́да всем се́рдцем возлюби́вый и ре́вностно Ему́ после́довавый! Се мы, раби́ недосто́йнии, благоче́стия и смире́ния не иму́щии, оба́че себе́ на всяк день в души́ велича́ющии, бли́жних осужда́ющии, не и́мамы пред Бо́гом, чим оправди́тися. Сего́ ра́ди мо́лим тя: моли́ за нас Го́спода, да пода́ст нам ум сло́во Его́ разуме́ти, да бу́дем не то́кмо слы́шателие, но и ре́вностнии его́ де́лателие, и да разуме́ем, я́ко ничесо́же мо́жем, кроме́ по́мощи Бо́жия.
Ей, свя́тче Бо́жий! Помози́ нам Го́спода возлюби́ти и Тому́ прилепи́тися все́ю душе́ю свое́ю, всем се́рдцем и помышле́нием, да пода́ст нам ра́дость, мир, долготерпе́ние и утеше́ние в ско́рбех по неизрече́нней Свое́й ми́лости, Ему́же подоба́ет вся́кая сла́ва, честь и держа́ва во ве́ки веко́в. Ами́нь.
Моли́тва и́на
О преподо́бне о́тче Гаврии́ле, чудотво́рче Самтаври́йский, по́двигом юро́дства Христа́ ра́ди просия́вый и И́мя Бо́жие во дни гоне́ний просла́вивый! Вознеси́ о нас моли́твы твои́ ко Го́споду, я́ко фимиа́м благоуха́нный, изба́ви нас, досточу́дне о́тче, предста́тельством твои́м от вся́кия беды́ и напа́сти, се́ти де́монския разруши́, вражду́ угаси́, неду́жныя исцели́. Не оскудева́ет река́ чуде́с Госпо́дних от ра́ки твоея́, преподо́бне, ниже́ изсяка́ет пото́к милосе́рдия Бо́жия к нам, гре́шным, моля́щимся тебе́. Да́ра ве́лия любви́ от Го́спода удосто́енный, бремена́ бли́жних носи́вый, о гре́шных и стра́ждущих сле́зы пролива́вый, принеси́ моли́твы на́ша и плач покая́нный ко Престо́лу Влады́чню, да сподо́бимся по́мощию твое́ю, достохва́льне о́тче, безпреткнове́нно пройти́ возду́шныя мыта́рства и дости́гнути Оте́чества Небе́снаго, иде́же непреста́нный глас пра́зднующих сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
